أنا المؤدن على صوتي تدور الشمس
أنا المؤدن على صوتي يقوم الدين
الله أكبر صبحنا بأول الصلوات
الله أكبر بصوت عالي
ويِبْدَا الهمس
فرخة بتجري في حارة ونور على ستارة
عسكر في قصر الإمارة يبدلوا النوبات
وناس دراوشة حيارى وناس لها تجارة
وناس بلذة ومرارة ينسجوا الحكايات
الله أكبر صلاة الظهر نرفعها
تحذير من الغارة وجيوش غُزِّ جرارة
تعلى الحرارة على الأسياف تلمَّعها
يجروا البشر ع البيوت
في السوق يشح القوت
دوشة وراها سكوت مستنيين الموت
إيده على صفحة التاريخ يوقعها
الله أكبر صلاة العصر علِّيها
جيش الأكارم ضراغم تحت قوس النصر
دهب يا لون الحيطان تضحك لهم في العصر
دق الطبول في الدروب
دق الطرب في القلوب
وحِسِّي فيهم يِدُوب تكبيري مسموع يا دُوب
كأنه طفلة تِشِبِّ براسها وإديها
تكبيرة المغربية عُرس أو زفَّة
طرحة تغطي ضفيرة وعمة مُلْتفَّة
والعين بتنظر تشوف
مدينة لابسة الشُفوف
سما تِحَنِّي الكُفوف
صوت الغُنا والدُّفوف
الشمس قارب وهُوَّ حاكم الدفَّة
تكبيرةِ الليل زيارِة شاي وأرجيلة
واليوم تِعِبْ بعد رحلِة يوم وترحيلة
والنور على المَدْنة بيقلب المعنى من الليل
ويجمعنا نيجي فمواعيدنا
والفجر مستنِّي من جبريل توصيلة
أنا المؤدن على صوتي تدور الشمس
أنا المؤدن على صوتي يقوم الدين
طالع على سلم المدنة بقى لي سنين
ما بيخلصوش السلالم تحت رجلَيَّ
مش عارف إيهْ اللي جرى فيها وجرى فِيَّ
أنا اللي كنت أجيبها في خطوتين بالأمس
الدمع سايل وبَلِّ الهِدْمَة والخُفِّين
أَبكي على صَلواتِ المسلمين الخَمْسْ!