يا مصر هانت وبانت كلَّها كام يُوم
نهارنا نادي ونهار الندل مش باين
الدولة ما فضِلشِ منها إلا حبِّة شوم
لو مش مِصدَّق تعالى عَ الميدان عاين
يا ناس ما فيش حاكم إلا من خيال محكوم
واللي ها يقعد في بيته بعدها خاين
اللي ها يقعد كأنه سلِّم التانيين
للأمن بإدِيه وقال له همَّه ساكنين فين
وصلِت لضرب الرُّصاص عَ الخلق في الميادين
حتَّى الجثث حجزوها اكْمِنُّهم خايفين
يا مصر أصبحنا أحيا وميِّتين مساجين
فاللي هايقعد في بيته يبقى مش مفهوم
واللي هاينزل إلهي حارسه وصاين
يا مصر هانت وبانت كلَّها كام يوم
نهارنا نادي ونهار الندل مش باين
نهارنا نادي وبإدينا على فكرة
الصبح عنده فضول راح نعمل إيه بكرة
إيده على الباب وخايف يلمس الأُكرة
أُدخل يا أستاذ براحتك والبلد حُرَّة
إحنا زهقنا نشوف الصُّبح من برَّة
الناس دي حرَّة وجنود الأمن مضطرَّة
يا صبح طلَّعت روحنا لأجل تِيجِي يا خيّ
طالعين نِجيبها أهو في كلِّ حارة وحيّ
حتى ولو ضربونا بالرُّصاص الحي
شوف المداين كِدا مفروشة خلق وضيّ
دايْماً مفاجأة ودايماً وقتها معلوم
الحكم لينا وليكي الحقّ يا مدايِن
يا مصر هانت وبانت كلها كام يوم
نهارنا نادي ونهار الندل مش باين
يا صف عسكر بدال الدِّرع شيلوا اتنين
خمسة وعشرين يناير يا شباب فاكرين؟
كان فيه إنكليز ووزير الداخليَّة تخين
كان عنده برضو عساكر زيُّكم جامدين
سابهم يموتوا علاولة لم سأل فيهم
كانوا شبهكم أساميكم أساميهم
يا عسكري البَهَواتِ اللي بِتِحمِيهم
ممكن يردُّوا عليك لما تناديهم؟
يا عسكري أنا أصلي بسِّ باستَغرَب
لو لاقي تاكل وتشرب قوم يا عمِّ اضرب
اضرب عشان الوزير من ضربتك يطرب
لكن هاتشتغل إيه لما الوزير يهرب؟
أما الشديد القوي القادر أبو القادر
برميل تلامة نشع على مصر مِ الآخر
لو شافِتُه معدِّدة تكتب أدب ساخر
ثابت يقول للهرم يا كابتِن اتَّاخِر
ولم يزل معتقد إن الهرم ها يقوم
آدي الحجر والبشر قايمين يا سيد القوم
والدين ها يتردِّ ياللي عشت متداين
يا أهل مصر انتصرنا كلها كام يوم
نهارنا نادي ونهار الندل مش باين
دا حكم أسرة ولا خوفو ولا خفرع
ولا وجع بطن يتعالج بزيت خَروع
عمل مسوجر بعيد عنَّك ولا يطلع
جرَّبنا فيه كلِّ شيء ما لقينا شي ينفع
ما طلعش بالأدوية جرَّبنا ألف طبيب
ولا بعطارة شيوخ ليهم بلح وزبيب
ولا بجحفل مغولي وضرب بالقباقيب
عمل مسوجر وسفلي شغل تل أبيب
وشغل أمريكا متغلِّف وختمه عليه
ضيف زارنا يا عمّ من غير دعوةْ، لابس بيه
قعد تلاتين سنة ما بيقولشِ قاعد ليه
والنيَّة يدِّيها لابنه النابغة بعديه
ويقول قضا وقدر بين البشر محتوم
قلنا له طيب ومين قال القدر معلوم
واش عرَّفك يا فخامتك بالذي كاين؟
يا مصر هانت وبانت كلها كام يوم
نهارنا نادي ونهار الندل مش باين