البراءة

يبني ظلعك من رچيته لظلعي جبرته وبنيته
يبني اخذني لعرض صدرك واحسب الشيب اللي من عمرك جنيته
يبني طش العمه ابعيني وجيتك ابعين القلب ادبي على الدرب المشيته
شيلت العلاگة يبني يذكر اچتوفي بلعب عمرك عليهن
سنه وجفوفك وردتين اعله راسي
وبيك اناغي كل فرح عمري النسيته
ياعمد بيتي وگمر ليلي
وربيع الشيب والعمر الجنيته
جيت اهزك ياعمد بيتي
لايكون الدهر ضعضع عظم منك للمذلة
وساومت جرحك على الخسة وچفيته
يبني خلي جرحك ينطف
خله يعف , خله ينزف
يبني الجرح اليرفض شداده علم للثوار يرفرف
يبني ابن الچلب يرضع من حليبي
ولا ابن يشمرلي خبزة من البراءة
يبني ياكلني الجرب عظم ولحم
وتموت عيني ولا الدناءة
يبني هاي ايام فرزنها القحط ايام محنه
يبني لاتثلم شرفنا
يبني يوليدي البراءة تظل مدى الايام عفنه
تدري يبني بكل براءة
كل شهيد من الشعب ينعاد دفنه
وخلي ايدك على شيبي واحلف بطاهر حليبي
كطرة كطرة
وبنظر عيني العميته
قلي ما أهدم حزب بايدي بنيته