طَفِّ النُّورْ طَفِّ النُّورْ
فِيه صُفَّارة جايَّة الغارة طَفِّ النور
صَف من الأقواس يتحرَّك
لو دقَّقت تلاقي ناس تجري طابقة الساس ع الراس
ناس بيقولوا أمرك أمرك
ولا فيش آمر ولا مأمور طفِّ النور طفِّ النور
والعتمة تْلِفِّ المعمور
وتساوي المزروع بالبُور
وعيونْ خَلْق صايبها المَسْ
مَرَّة تْبَرَّقْ مرة تدورْ
حايرة العين مش قادرة تفَرَّق بين الحق وبين الزور
طفِّ النور طفِّ النور
اسبَقْ اسبَقْ خُشِّ الملجأ
وفريح اللي فريحَكْ الزَق
شيخْ بيكُح
تسري العدوَى يكحّ الكُلّ
واد في كفوفه حِتِّة عيشْ
غيرها ما فيش ومن الشحّ
كَلْ وما قالش لواحد كُلْ
يملا الملجأ شعب مْزَنَّق
متجمَّع لكنّه مْفّرَّقْ يِخْلوا بيها فَتِخْلى الدُّورْ
طفِّ النور طفِّ النور
حبة ويبدأ ضرب النار
يا وشوشهم نشرة أخبار
كله مْقَلَّقْ
والخوف داقِق فيهم زار
بس ما حدِّش قادر ينطق
وصاروخ جاي عليهم دُغْري
سِرب الطير للصياد مُغري
إزاي شافنا؟
واحنا مش شايفين أوصافنا
كاتمين الحركة والحِسّ
وما فيش حيّ عشان يقولوا لُه
والموت يتشم ويتجَسْ
والمَوْتَى ما لهمش قبور
طفِّ النور طفِّ النور
يا ملجأنا يا مغدور
جُحْر المؤمن مَرَّة وبَس
من يومك والدرس اتْحَس
لمّا الموت بتدق طبولُه ويُصرُخ فينا عُمْر بْطولُه
فيه صفارة جاية الغارة
نقيد النور
قيدوا النور