مرينه بيكم حمد وأحنه بقطار الليل
وأسمعنه دق اقهوه وشمينه ريحة هيل
ياريل صيح أبقهر صيحة عشك ياريل
هودر هواهم ولك حدر السنابل كطه
***
يابو محابس شذر يالشاد خزامات
ياريل بله بغنج من تجزي بمشامات
ولا تمشي مشية هجرقلبي بعد مامات
هودر هواهم ولك حدر السنابل كطه
***
جيزي المحطهْ بحزن وونين يا فراقين
ما ونسونه بعشقهم عيب تتونسين
ياريل جيم قهر،أهل الهوى أمجيمين
هودر هواهم ولك حدر السنابل كطه
***
ياريل طلعوا دغش والعشق جذابي
دق بيه طول العمر ما يطفهْ عطابي
نتوالف ويه الدرب وترابك ترابي
هودر هواهم ولك حدر السنابل كطه
***
أرد أشري جنجل وألبس الليل خزامه
وارسم بدمع الضحك نجمه وهوى وشامه
وياحلوه بين النجم طباقه لحزامه
هودر هواهم ولك حدر السنابل كطه
***
كأن حمد فضهْ عرس كأن حمد نرجيله
مدقق بمي الشذر ومشله أشليله
ياريل ثقل يبويه وخلي أناغيله
يمكن أناغي بحزن..منغه..ويجن الكطه
***
آنه أرد ألوك لحمد ما لوكن لغيره
يجفلني برد الصبح وتلجلج الليره
ياريل باول زغرنه لعبنه طفيره
هودر هواهم ولك حدر السنابل كطه
***
كضبة دفو يانهد لملمك برد الصبح
ويرجفنك فراقين الهوى ياسرح
ياربل لا…لا…تفززهن..تهيج الجرح
خلهن يهودرن حدر الحراير..كطه
***
جن كذلتك والشمس والهوى هلهوله
شايل بريسم والبريسم أله سوله
وذري ذهب يا مشط يالخلقك شطوله
بطول الشعر والهوى البارد ينيم الكطه
***
تو العيون أمتلن ضحكات وسواليف
ونهودي زمن والطيور الزغيره تزيف
ياريل سيس هوآنه وماأله مجاديف
هودر هواهم ولك حدر السنابل كطه