خد عندك اوصف قهوة في الشارع
كل اللي قاعد فيها حاطط رجل فوق التانية
والرجل اللي فوق وكأنها هتْشوط
قاعد ينطّق فوقها أحواله كما الكورة
والكورة بَنّورة
يبحلق فيها ويفكّر
مشوار طويل ع الرجل زي القُطّ متكوّر
والرجل تتمرجح كفِعل المهد
من هزاته تلقى القُطّ متخدَّر
أشعث كما غَزْل البنات وعليه عينين واشْناب
يتأملوا في الشعر الأبيض والرمادي فرقة الشياب
مترصَّصِين كده جنب بعض كأنهم
لازمة على نوتة موسيقي قاعدة تتكرر
رجل الزبون متوازية مع رجل اللي جنبه
كأنها تنوين
والشيشة جنب الشيشة
والليّات خطوط بالورب زي قوايش العسكر
الكل ثابت خالص إلا القهوجي
مارر على صف الكراسي يوصل الطلبات
مترصصين ومرصرصين
ده واد رصين
وده قهوجي
وده برمجي
وده بهرجي
وده معترض
وده أيوجي
وده واد ما بين الاتنين
الرجل فوق التانية والرجل اللي فوق
وكأنها هَتشوط
طوب الرصيف تحت الكراسي قعد يخط خطوط
وكأنه قال لك ده مهم وده مهم
تبُصّ فوق الخط تعرف قد إيه كدَّاب
رَأي الدُّخَان الهادي في العبثية
ناقْشُه ع الهوا نقّاش
والصبح والشبورة شاش بيغلف المنظر
بيلَصَّمُه تلصيم كأنه لزق أو ضِمَادات
والشمس زيّ طبيبة إيدها تقيلة ع المساكين
تطلع تشيل الشاش
عن المنظر
فَيتْكَسَّرْ!